CEBU – Tuyo ni Cebu City Mayor Michael Rama nga abli sa publiko ang tanang simbahan sa dakbayan sa Sugbo atol na sa Misa de Gallo o ang siyam ka adlaw nga misa sa kadlawon sa dili pa ang Pasko.
Apan iyahang gitataw nga ang simbahan ug mga parokyano kay kinahanglan nga musunod sa mga guidelines sa City government sa pag-atubang sa pandemya.
Samtang, wala usab niini gi-require ang publiko nga magsul-ob ug facemask sulod sa mga simbahan ug mas maayo nga itugyan na lang sa publiko ang ilahang kagustohan kalabot niini.
Matud pa, hatagan usab ug kagawasan ang mga simbahan sa pagpili sa ‘schedule’ ug gidaghanon sa mga misa nga ipahigayon sa maong mga adlaw.
Ang Misa de Gallo ipahigayon alas 3 sa buntag hangtud sa alas 5 gikan sa Disyembre 16 hangtud sa 24 matag tuig.
Kahinumdoman nga sa nakalabay nga tuig, ang Archdiocese of Cebu mipatuman ug 50 porsyento nga seating capacity sulod sa mga simbahan gumikan sa hulga sa COVID-19, ingon man ang publiko wala makatambong ug mga misa gumikan sa kakuwang sa kuryente ug pagkagusbat sa mga istruktura mugna sa kadaut nga dala sa bagyong Odette.
