CEBU CITY – Mipasaka og kasong kriminal ang mayor sa lunsgod sa Compostela, Cebu nga si Joel Quiño batok sa management sa Kabus Padatuon (KAPA) Ministries sa maong lungsod.
Kini gumikan kay nag-operate ang maong investment scheme sa Brgy. Poblacion nga walay igong papeles sama lang sa Mayor’s Permit ug Mayor’s Business Permit.
Una niini, nagkig-alayon ang local government unit sa Compostela sa kapulisan may kalabutan na sa giingong ilegal nga operasyon sa KAPA kinsang gipadagan ni Benju Barreto.
Matud sa hepe sa Compostela Police Station nga si Captain Ian Macatangay nga nag-operate ang KAPA sukad miaging buwan diin libuan ka mga empleyado sa gobyerno ug private sector sa Compostela ug sa mga kasikbit nga lungsod ang misulod sa maong investment scheme.
Human napamatud-an ang maong ilegal nga operasyon, mi-isyu og cease and desist order ug closure order ang LGU sa Compostela aron pasirad-an ang buhatan sa KAPA.
Apan gibutyag usab ni Macatangay nga gitangtang dayon sa KAPA management ang closure order ug nagpadayon kini sa ilang operasyon.
Nasayran nga nasikop ang mga security guards nga silang Dexter Cuyos ug Robert Padayogdog atol sa post-to-post inspection sa KAPA office sa Compostela human nakuhaan og ilegal nga armas.
Matud pa usab ni Capt. Macatangay nga padayon pang nakig-alayon ang Compostela Police Station ug ang buhatan ni Mayor Quiño alang sa mga mosunod pang mga lakang batok sa investment scam nga KAPA.
Samtang gi-monitor gihapon sa Police Regional Office VII kung adunay bay mga sakop niini nga misulod sa maong investment scam.
