PROVINCE OF CEBU-Nanawagan si Cordova Mayor Cesar “Didoy” Suan sa publiko nga isumbong sa lokal nga kagamhanan, buhatan sa Cordova Traffic Management (CTM) ug Cordova Municipal Police Station (MPS) ang mga drayber nga magpahimulos sa pagpaningil og mahal nga plitehan paingon sa mga tourist destination sa lungsod.
Matod ni Suan nga silotan ang mga drivers nga mosupak sa lagda sa lungsod.
Kini human ubay-ubay na ang nadawat niya nga mga reklamo kabahin sa dili patas ug dili makiangayon nga plitehan paingon sa 10,000 roses nga usa ka tourist attraction sa lugar.
Subay niini, gimando ni Suan ang pagsusi sa maong reklamo ug nasuta nga supak kini sa ordinansa sa lungsod, Ordinance No. 2022-78 nga nagmando sa patas nga rate sa plitehan sa mga tricycle, motorkad, ug trisikad sa lungsod ug ang mga silot nga kinahanglan niining atubangon kon ugaling masakpan.
Base sa maong ordinansa, magsugod sa P15 ang regular nga plitehan sa mga pasahero.
Kon ugaling duha ngadto sa tulo o mo sobra pa ang pasahero nga mosakay, paubsan lang kini sa P10 ang matag pasahero.
Dunay discount alang sa mga estudyante, senior citizen ug persons with disability (PWD) nga anaa lang sa P10 ug kon daghan ang mosakay, P8 na lang.
Ang molapas sa pagsunod sa mando, pamultahon og P1,000.
Subay niini, giawhag ang mga pasahero ingon man lumolupyo sa Cordova o bisita lang, nga i-report ang mga abusadong driver pinaagi sa pagkuha og hulagway sa motorkad unit apil na ang plate number ug driver niini.
Mahimong mobisita sa opisina sa CTM alang sa pormal nga pagduso og reklamo.
