Nagduso og lakang ang National Irrigation Administration (NIA) alang sa pagpalapad sa paggamit sa mga solar irrigation system sa Bohol samtang ang probinsya nag-atubang sa hulga sa pagkauga sa mga tinubdan sa tubig sa dili pa ang ting-init.
Matod pa ni NIA Engineering and Construction Operations Systems Chief Evaristo Borja, ang mga tinubdan sa tubig sa ilalom sa yuta nagpabilin nga buhi bisan kung ang mga tinubdan sa tubig sa ibabaw uga na, bisa ang paghimo sa mga solar-powered pumping system usa ka praktikal nga kapilian alang sa mga hilit nga lugar sa umahan.
Ang Bohol adunay gibana-bana nga 30,300 ka ektarya nga yuta sa umahan nga gipailalom sa irigasyon pinaagi sa Bohol Irrigation System (BIS) ug Bohol Integrated Irrigation System (BIIS) sa NIA, gikan sa gibanabana nga 104,000 ka ektarya nga potensyal nga yuta nga matubigan. Diin, dul-an sa 70,000 ka ektarya ang nagpabilin nga walay irigasyon.
Tungod kay kadaghanan sa mga tinubdan sa tubig sa ibabaw gigamit na alang sa irigasyon, ang NIA midangop sa mga solar irrigation system aron mapalapdan ang sakop sa nahabilin nga mga umahan.
Ang mga solar irrigation system naggamit og solar energy aron mapaandar ang mga water pump imbes nga mga diesel generator o grid electricity.
Makakuha silag tubig gikan sa mga suba, lim-aw, reservoir o mga tinubdan sa ilalom sa yuta ug ipaagi kini sa mga umahan pinaagi sa mga elevated storage tank, drip irrigation lines o bukas nga mga kanal.
