CEBU CITY– Nag-implementar na og striktong precautionary measures ang Mactan Cebu International Airport (MCIA) nunot ng pagkatap sa bagong coronavirus nga gikan China.
Kini human nga nakompirmar nga dunay 5 anyos nga bata’ng chinese ang nagpositibo sa coronavirus kinsang mibiyahe gikan sa Wuhan, China padulong sa Cebu City. Samtang dali usab kini nga nadala sa usa ka pribadong tambalanan sa dakbayan ug karon giingong stable na.
Gihimo ang maong lakang aron nga makontrolar ang pagkatap sa ‘novel coronavirus’. Nunot na usab kini sa pag-anunsyo sa Bureau of Quarantine sa nagkalain-laing stakeholders sa tugpahanan nga duna na sila’y 8 flights nga gimonitor gikan China.
Muagi ang tanang pasahero sa Thermal Scanning para masiguro nga wala sila nataptan sa naasoy nga virus. Gi-awhag usab sa kadagkuan sa MCIA ang mga pasahero nga boluntaryo nga mupaubos sa medical screening sa dili pa mukanaog sa eroplano kung aduna’y nasinati nga sintomas sa flu.
Duna na usa gi-install nga alcohol based hand sanitizers sa tanang aerobridges ug arrival corridors kung diin awhagon ang mga pasahero nga mugamit niini. Gi-isprayhan usab ang mga aerobrigdes sa dili pa mulanding ang mga eroplano.
Gipahibaw usab sa naasoy nga airport sa tanang mga pasahero nga kinahanglang magsul-ob og surgical mask.
Nasayran nga dunay 36 ka mga flights gikan China patungong Cebu ang MCIA matag semana. | with reports from Bombo Crislie Adlawan
