CEBU CITY-Normal gihapon matud pa ang operasyon sa Mactan-Cebu International Airport (MCIA) bisan pa man og gipaubos kini sa state of emergency subay sa hulga sa 2019 novel coronavirus.
Matud sa Chief Executive Advisor sa GMR Megawide Cebu Airport Corporation (GMCAC) nga si Andrew Harrison nga dili apektado ang inadlaw-adlaw nga dagan sa tugpahanan bisan pa man sa mas strikto nga precautionary measures niini batok sa nCoV.
Dugang pa ni Harrison nga wala silay mga kabag-uhan gawas lang sa ilang mga procedural changes diin pinasubay kini sa mga direktiba sa health authorities.
Samtang gitataw ni Atty. Steve Dicdican, ang general manager sa Mactan Cebu Int’l Airport Authority nga gipaubos ang tugpahanan sa state of emergency nga gumikan kay aduna silay gipreparar nga kahimanan alang sa mga Pilipino gikan sa China nga ipaubos sa 14-day quarantine.
Mipasalig si Dicdican nga andam kanunay ang MCIA kun ugaling mas mugrabe pa ang sitwasyon.
Nasayran nga gipatuman sa MCIA ang dugang pang mga precautionary measures sama lang sa: mandatory health declaration cards alang sa tanang international flights, dili pagpasulod sa mga foreign passengers gikan sa China, Hong Kong, ug Macau, quarantine assessment alang sa mga Pilipino ug permanent resident visa holders nga mibyahe gikan sa nahisgutang lugar.
Nagtinabangay ang MCIAA, Bureau of Immigration, ug Bureau of Quarantine, alang sa pagpatuman sa mga protocols aron sa ingon, dili mapektuhan ang uban pang flights.
