CEBU CITY – Nakasinati ug trauma ang usa ka medicine post intern graduate human kini gidagit kaganihang buntag sa F. Ramos Extension dakbayan sa Sugbo.
Luwas nga napalgan si Julian Iñaki Larrazabal Garcia sa Carcar City Police Station sa sitio Dandan, barangay Poblacion I, dakbayan sa Carcar diin kini gibyaan sa mga kidnapers.
Nakahiagom ug mga bun-og sa kalawasan ang biktima.
Gibutyag ni PO1 Francisco Saberon nga nadawat nila ang impormasyon gikan sa usa ka barangay tanod nga si Edben Laog-laog mahitungod sa kadudahang van nga misud sa maong sitio.
Sumala ni Saberon nga gisaysay sa biktima nga musakay na unta kini sa iyang sakyanan sa dihang kalit nga miduol ang tulo ka kalalakihan.
Giingong gitiunan siya ug armas ug gipugos pagpasakay sa HiAce van nga adunay temporary plate number nga 1351, gitabonan ang iyang mga mata ug gigapos ang mga kamot.
Di pa igo sa dihang nagbyahe na giingong gisumbag siya ug gidokdok ug gahi nga butang.
Sa pagkakaron nakabalik na sa iyang balay si Garcia ug wala na kini’y gidugang sa iyang mga pamahayag kalabot sa insidente.
Samtang si Cebu City Councilor Dave Tumulak, deputy mayor for police matters nagkanayon nga nianang gabii sa wala pa ang insidente adunay HiAce van duol sa balay sa biktima.
Sa pagkakaron padayon ang imbestigasyon sa kapolisan sa maong pagpanagit.
