CEBU – Pormal nang gi-turnover ang 100 units nga medium-rise building nga gitawag ug “Walk Up Sugbo-1” sa Cebu City Government, diin nahimutang sa Barangay Lorega, San Miguel.
Gitambongan ang maong aktibidad nila ni Cebu City Mayor Mike Rama, Vice Mayor-elect Raymund Garcia, Cebu City Councilor ug Committee on Infrastructure chairman Jerry Guardo, Department of Human and Settlements and Urban Development Sec. Eduardo Del Rosario, Cebu Landmaster President/CEO Jose Soberano III, ingon man si Barangay Lorega Kapitan Fritz Herrera.
Katuyoan sa maong Public-Private-Partnership (PPP) ang paghatag sa gatusan ka mga informal settlers ug luwas ingon man malinawon nga lugar nga ilahang kapuy-an.
Gibutyag ni Cebu City Councilor ug Committee on Infrastructure chairman Jerry Guardo, nga mao na kini ang standard nga relocation sites nga pagahimuon ubos sa administrasyon ni Mayor Rama.
Diin usa kini ka dakong kalamboan sa syudad gumikan dili na kini susama kaniadto nga sa mga bukirang dapit irelocate ang mga apektadong residente.
Gani gi-angkon ni Guardo nga kutob sa mahimo paningkamutan sa dakbayan nga mapahimutang ang mga relocation sites sulod ra usab hurisdiksyon sa syudad.
