CEBU – Patay ang usa ka lalaki human nga gipusil sa wala pa mailhing mamumuno sa may dalan Borromeo, corner Climaco Street, pasado alas 12 kaganihang kadlawon.
Giila ang biktima nga si Rondelyn Salada, 39 anyos, adunay live-in partner, usa ka mekaniko ug residente sa Sitio Omega, Barangay Pahina Central, Cebu City.
Sa inisyal nga imbestigasyon sa kapulisan, naglabay ug basura ang biktima sa dihang mi-abot ang mamumuno ug namusil sa makadaghang higayon.
Basi usab sa mga silingan sa biktima, giingong daghan na ang nangita niini gumikan kay wala maka-uyon sa iyahang serbisyo.
Subay niini, gilantaw sa kapulisan nga posibling adunay personal nga kasuko ang nagbuhat sa krimen.
Nakuha sa crime scene ang upat ka kabhang sa kalibre 45 nga pistola ug ang biktima ang gidala sa punerarya alang sa ipahigayon nga post mortem examination.
Samtang, emosyonal ang asawa sa biktima nga si Joy Garzo nga misinggit ug hustisya alang sa iyahang kapuyo.
Matud pa, wala kini gitumban nga tawo ug nagpakahilom lang kini bisan pa man sa pagdaut sa mga tawo.
Gisaysay usab niini nga igo lang naglabay ug basura iyahang kapuyo ug wala pa’y 10 minutos nakadawat kini ug taho kabahin sa insidente.
