CEBU PROVINCE
Pasakaan na og kasong rape ug child abuse ang duha ka mga suspetsado sa pagpanglugos sa usa ka 12 anyos nga babaye sa dakbayan sa Carcar. Sa pakighinabi sa Bombo Radyo kang PO3 Kamya Cudo, ang Women and Children Desk Officer sa Carcar Police Station nga ang mga suspetsado nga sila si Jonathan Requinto, 23 anyos ug Ryan Sabelario, 18 anyos ang ipaubos usab sa drug test arun sa pagsuta kung tiggamitan og iligal nga drogas ang duha. Una niini, niadtong Marso 16 sa alas 7 sa gabii giingong nakit-an sa mga suspetsado nga naglakaw ang biktima paingon sa ilahang panimalay ug dayung signit niini ngadto sa kalibonan ug didto gibuhat ang krimen. Nasayran nga dili kini ang unang higayon nga nahilabtan ang biktima gumikan kay niadtong Marso 13 pasado alas 8 sa gabii sa dihang nagpalit og butane ang biktima gisignit usab kini ni Requinto ug didto gibuhat ang pagpanastamas sa pagkababaye niini. Giingong wala musumbong ang menor de edad sa unang higayon gumikan sa kahadlok sa bahad ni Requinto nga iyaha kining patyon. Sa pagkakarun, anaa sa pink room sa Vicente Sotto Memorial Medical Center (VSMMC) ang biktima alang sa pagsusi kung nahilabtan gayud ang pagkababaye niini.
