CEBU CITY – Nasikup ang usa ka menor de edad nga upat ka buwan nga mabdos sa gipahigayun nga buybust operation sa Osmeña Drive, Tres de Abril,
Barangay Labangon, dakbayan sa Sugbo.
Giila lang ang subject sa ngalan nga “Eva”, 17 anyus ug residente sa nahisgutang dapit.
Gi-asuy ni Police Captain Joffrey Grande, ang hepe sa City Drug Enforcement Unit, nga nakadawat sila ug report kalabut sa iligal nga binuhatan sa menor de edad hinungdan nga dali nila gipa-ilawum sa surveillance ug sa dihang nag-positibo, ilaha gilayun kining gipaubus sa operasyon.
Nakuha gikan sa subject ang siyam ka pakete sa shabu nga mitimbang ug 175 gramos ug nagkantidad ug P1,224,000.
Nasayran nga usa ka high value target sa kapulisan ang menor de edad ug nagtingkagul kini karun sa Cebu City Police Office detention cell.
Samtang giangkun usab ni Eva nga nahimu niini ang pagpamaligya ug shabu arun nga adunay ikagastu sa iyahang pagpanganak.
