Patay ang 15 anyos nga lalaki samtang naangol ang 19 anyos nga babayeng angkas niini human na-overshoot ug mibangga ang ilang gisakyang motorsiklo sa kurbadang bahin sa National Highway nga sakop sa Barangay Ibo, Dakbayan sa Toledo, Probinsiya sa Sugbo kagahapon, Sabado pasado 1:40 sa kadlawn. Agosto 1, 2026.
Sa imbestigasyon sa kapulisan sa Toledo City nasayran nga walay lisensya ang 15 anyos nga biktima nga mimaneho sa motorsiklo ug wala sab nakitang OR/CR ug plate number.
Gikataho nga gisubay sa mga biktima ang National Highway gikan sa Brgy. Poblacion padulong Barangay Bato sa diha nga nawad-an kini og kontrol sa kurbadang bahin sa maong dalan nga sakop sa Brgy. Ibo ug mibangga sa metal railing sa maong highway.
Daling gidala sa Toledo District Hospital ang mga biktima diin gideklarar nga dead on arrival ang 15 anyos nga motor rider samtang padayong nagpaalim ang 19-anyos nga angkas niini.
Padayon pa usab ang imbestigasyon sa Toledo City Police Station sa maong aksidente. via Bombo Rexmond Omega
