Gipatukar sa Mexico ang ilang istilo sa ilang iconic nga Azteca Stadium niadtong Martes, human nila gipildi ang Ecuador sa score nga 2-0 aron mabungkag ang ilang FIFA World Cup knockout curse nga nagsugod 40 ka tuig na ang milabay.
Diin sa maong kadaogan usab batok sa Ecuador, nakahirit kini ug mi-advance ngadto na sa round of sixteen.
Subay niini, eksklusibong gihinabi sa Bombo Radyo Cebu si Ivan Marino, ang Bombo International News Correspondent sa Mexico, diin iyahang gikabutyag nga nakabati sila og “excitment” ug kahadlok sa maong match.
Dugang niya nga ang maong match usab nakahimamat og pagkabarda gumikan sa bati nga panahon niadtong tungura, nga miresulta usab sa hinuwatay og kapin sa oras.
Apan sa dihang gasugod na ang duwa, matod ni Marino lig-on ang depensa sa Ecuador pero wala kini makabang-bang sa lig-ong depense nga gipasalir sa Mexico.
Ang maong kadaugan nikuha sa samang iskor ug nahitabo sa samang dapit diin kataposang nakalusot ang nasod sa usa ka knockout round niadtong 1986 batok sa Bulgaria, ang kataposang higayon nga ang Mexico maoy ni-host sa maong torneyo.
Bisan pa man nga ang bag-ong 48-team format nagpasabot nga wala pa hingpit makab-ot sa Mexico ang ilang dugay nang tinguha nga makasulod sa quarterfinals, ang kadaugan niadtong Martes nagtapos sa ilang pito ka sunod-sunod nga kapildihan sa unang knockout stage.
Nagpabilin usab nga lig-on ang ilang rekord sa Estadio Azteca diin kaduha pa lamang sila mapildi sa 89 ka competitive games, samtang wala pa gihapon kini mapildi sulod sa 10 ka dula sa World Cup nga gipahigayon sa Mexico City.
