Mexico, naminghoy sa kapildihan batok England sa FIFA World Cup 2026; Mexican players, gipasigarbo gihapon sa mga fans—BINC, Mexico
Nasayang sa Mexico ang ilang dakong bentaha isip host ug ang kahigayonan nga makasulod sa mas lawom nga hugna sa FIFA World Cup 2026, kini human sila mapildi sa higanteng team nga England, 3-2, niadtong Dominggo sa gabii.
Subay niini, eksklusibong gihinabi sa Bombo Radyo Cebu news team si Ivan Marino, ang Bombo International News Correspondent sa Mexico, diin iyang gikabutyag nga sa maong kapildihan sa Mexico, mingaw ug mabati ang kasagmuyo sa mga fans niini, kini gumikan kay walay mga selebrasyon ug mga kalihokan sa mga kadalanan nga gipahigayon.
Apan matod ni Marino, bisan paman sa maong kapildihan, sila nga mga meksikano, giila nila nga angay ikapasigarbo gihapon ang mga representante sa ilahang nasud nga mipasundayag sa FIFA World Cup, tungod kay alang kaniya, usa kini sa mga kinadak-an nga nakabuhat og kasaysayan sa maong duwa.
Sa maong duwa, bisan pa man sa suporta sa 80,824 ka madasigon nga fans sa Estadio Azteca ug sa bentaha nga mas daghan sila og magduduwa sa pito ka bahin sa second half, nakapuntos kini og kaduha apan napakyas sa pagtabla sa iskor.
Wala makapugong ang depensa sa Mexico, nga wala untay gitugot nga puntos sa ilang unang upat ka mga duwa, sa kakusog ni Jude Bellingham human kini mopasulod og duha ka goal sulod lang sa 98 segundos sa first half.
Kini ang nahimong ikatulong kapildihan sa Mexico sa sulod sa Azteca sukad kini giablihan niadtong 1966, sunod sa duha ka managlahing 2-1 nga pildi batok sa Costa Rica niadtong 2001 ug Honduras niadtong 2013 sa World Cup qualifiers.
