Gimanduan karon sa paggamit sa mga produkto nga episyente sa enerhiya ug unahon ang pag-instalar sa mga solar rooftop system ang mga ahensya sa gobyerno sa tibuok nasud aron makatabang sa pagpakunhod sa konsumo sa kuryente sa sektor sa publiko ug pagpadali sa pagbalhin ngadto sa clean energy.
Matod sa Department of Energy (DOE), nga maoy nangulo sa Inter-Agency Energy Efficiency and Conservation Committee (IAEECC), ang desisyon sa komitiba sa pag-aprobar sa resolusyon alang niini nga direktiba gihimo atol sa tigom niini niadtong Septiyembre 16 subay sa Government Energy Management Program (GEMP).
Ang resolusyon, giingon niini sa usa ka press release niadtong Huwebes, Septiyembre 18 nga nag-require sa tanang buhatan sa gobyerno nga mosunod sa Minimum Energy Performance Standards (MEPS) ubos sa Philippine Energy Labeling Program (PELP).
Ang MEPS nagtakda sa minimum efficiency levels sa mga appliances, kagamitan, ug uban pang mga produkto nga makakonsumo sa enerhiya sa dili pa kini mabaligya o magamit.
Ang DOE nagkanayon nga ang IAEECC kasamtangang nagsusi pag-usab sa Joint Memorandum Circular nga gitumong sa pag-establisar og dedikadong Energy Efficiency and Conservation (EEC) Offices sa mga local government units.
