CEBU CITY-Mabulokon ang gipahigayon nga Flower-giving sa dakbayan sa Talisay diin ang mga personnel sa Talisay City Police ang personal nga mipaabot sa mga tingkad nga puwa nga mga rosas.
Ug uban pang mga kasikbit nga lungsod nga naghatag og mga tam-is nga pahiyom ngadto sa katawhan.
Nagmalampuson usab ang gipahigayon nga aktibidad sa mga kapulisan sa Sugbo diin gipangulohan ni Cebu City Director, Police Colonel Ireneo Dalogdog sa Magellan’s Cross arun sa pagpanghatag og mga buwak subay sa bag-o lang nahuman nga Valentine’s Day.
Atol sa pakighinabi sa Bombo Radyo Cebu News Team kang PCol. Dalogdog nga usa sa mga tumong sa ilang kalihokan arun ipaabot sa publiko ang gugma ug maghatag sa katawhan og inspirasyon nga pilion nga mopatigbabaw ang gugma.
Dugang pa niini nga subay sa ilang hingpit nga pagpatuman sa seguridad mipakatap kini og mga patrol sa nagkadaiyang mga balay pahulayan, suruyanan, ug uban pa nga mga lugar sa dakbayan nga bisitahon sa mga mag-pamilya, higala ug manag-uyab.
Samtang, mipadayag usab ang opisyal og pasalamat sa mga Sugboanon sa ilang pagsalig ug ingon man nga mipasalig kini nga magpadayon ang ilang pagbantay alang mamintinar ang kalinaw ug kahapsay sa tibuok Cebu.
