CEBU CITY — Nagdumili ang mga residente sa Sitio Cadauhan, Barangay Talamban, syudad sa Sugbo, sa pagbiya sa ilahang area gumikan sa kabalaka sa ilahang mga butang.
Kini bisan pa man sa ka risgo sa sitwasyon human nga nahitabo ang pagdahili sa yuta sa ilahang dapit kagabii.
Basi sa pakighinabi sa Bombo News Team ni Talamban Councilor Noel Seno , gibana-banang anaa sa 20 ka mga panimalay ang apektado sa nahitabong landslide kung diin tuyo sa barangay nga temporaryo unta nga magpasilong ang mga apektadong pamilya sa Talamban Barangay Gym, apan giingong dili gusto nga mamiya ang mga residente sa ilahang panimalay.
Matud pa nga nabalaka ang mga residente sa mga butang nga mabiyaan sa ilahang tagsa-tagsa ka mga panimalay.
Una niini, pasado alas 10 kagabii sa dihang gipukaw ang mga residente sa naasoy nga dapit sa nagdahunog nga yuta, ingon man pagligid sa mga bato paingon sa ilahang mga atop.
Gibutyag ni Louwina Edullantes, usa sa mga apektadong resident, nga susamang iring ang mi-ambak sa ilahang atop apan sa dihang iyahang gisusi, dako ang kakurat niini sa dihang nakita ang midahili nga yuta.
Hinuon, wala may natala nga namatay o samdan sa maong insidente.
Ang landslide ang resulta sa walay hunong nga pag-uwan sa Sugbo sukad pa kagahapon. /SBR
