PROVINCE OF CEBU-Gisuportahan sa walo ka mga mayor sa dakbayan ug munisipyo sa Sugbo nga ‘ma-status quo’ ang MCWD, human sa interbensyon sa Local Water Utilities Administration.
Kini human ang interim board sa LWUA nipahibawo niadtong Abril 12 bahin sa temporaryo pag appoint ni Atty.John Dx Lapid isip acting General Manager sa MCWD
nunot sa 90 ka adlaw nga preventive suspension ni Edgar Donoso.
Gumikan kay matud sa LWUA nga nagpadayon siya sa pagsupak sa hangyo sa interim board nga i-turn over ang mga dokumento bahin sa mga transaksyon sa MCWD ug napakyas siya sa pagtubag sa lima ka adlaw nga pahibalo aron ipasabot ang iyang desiyon.
Kung diin, Lima ka mga municipal mayors ug tulo ka mga mayor sa dakbayan, kansang hurisdiksyon naa sa service areas sa Metropolitan Cebu Water District, nipirma og Manifesto of Support alang sa mga opisyal sa MCWD nga gipanguluhan ni Chairman Jose Daluz III ug general manager Edgar Donoso.
Kini nga mga mayor naglakip nila ni Mandaue City Mayor Jonas Cortes, Lapu-Lapu City Mayor Ahong Chan, Talisay City Mayor Samsam Gullas, Cordova Mayor Cesar Suan, Consolacion Mayor Teresa Alegado, Liloan Mayor Aljew Frasco, ug Compostela Mayor Felijur Quiño.
Ingun man si Daanbantayan Mayor Sun Shimura, kansang lugar wala giserbisyuhan sa MCWD, nipirma usab sa manifesto sa iyang kapasidad isip presidente sa League of Municipalities of the Philippines – Cebu Chapter.
Gihimu-atan usab ni Gwen, nga kini ang ‘worst time’ nga mangilabot nag LWUA sa mga kalihokan sa MCWD ilabi na nga anaa sa tunga-tunga sa problema sa suplay sa tubig tungod sa El Niño phenomenon.
Samtang, nahimong emosyonal ang gitudlo nga bag-ong acting General Manager sa MCWD nga si Atty.John Dx Lapid sa dihang wala kini gipasulod sa edipisyo alang sa iyang unang adlaw sa paglingkod sa posisyon.
Kini human nga ang board of directors nga gipangulohan ni chairman Jose Daluz nagpatuman sa usa ka lockdown, nga nagdili kaniya ug mga miyembro sa interim board of directors sa pagsulod sa lugar sa water district.
Gani, hugot nga gibarugan niini nga wala siya’y nahimo nga kalapasan, kundili ang pagsunod lamang sa kamandoan sa Local Water Utilities Administration (LWUA).
