Gipahibalo sa International Boxing Association (IBA), nga hatagan nila og premyong kuwarta ang bisan kinsa nga mahimong Olympic champion ug medalist sa Paris Olympics.
Matod sa IBA nga ang gold medalist makadawat og $100,000 samtang adunay $50,000 ang silver medalist ug $25,000 ang bronze medalist.
Dugang pa ni IBA president Umar Kremlev nga ang ilang National Federation makadawat usab og $25,000 samtang ang coach makadawat og $25,000.
Ang IBA dili mo-host og boxing tournament sa Paris Olympics human gihukasan sila sa International Olympic Committee og recognition sa miaging tuig.
Ang nasangpit nga lakang nunot sa gipahibalo sa World Athletics nga mohatag sila og $50,000 nga ganting salapi sa mga kampiyonato.
Ang Paris Olympics modagan gikan sa Hulyo 26 hangtod Agosto 11.
