CEBU – Marso 15 dihang gi-anunsiyo sa Inter-Agency Task Force for the Management of Emerging Infectious Diseases (IATF-MEID) nga nag-inusara sa Central Visayas nga napuno sa listahan ang dakbayan sa Sugbo nga ipaubos sa Alert Level 1.
Daghan ang nalipay apan daghan usab ang nakapangutana gumikan aduna pay laing mga syudad sa Metro Cebu ang tag-as og vaccination rate ingon man ang kamubo sa kaso sa Covid-19 sa matag lugar sama sa dakbayan sa Mandaue, Lapu-Lapu, Talisay ug lungsod sa Minglanilla.
Hinuon, gi-angkon ug giklaro ni Dr. Mary Jean Loreche, ang tigpamaba sa Visayas Vaccination Operation Center (VVOC) ug chief pathologist sa Department of Health Central Visayas, nga ilaha nang gipasaka sa IATF ang maong concern o butang diin nihangyo kini nga kinahanglan nga adunay data reconciliation gumikan nakita niini nga adunay problema sa paghatag sa datos ug pagdeterminar sa Alert Level 1.
Matod pa ni Loreche nga kung tan-awan lang ang comliance sa dakbayan sa mga senior nga fully vaccinated nakaabot na kini sa target apan butang nga gikahibulngan og nganong wala malakip sa maong alert level status ang ubang lugar.
Tino pa niini, nga kinahanglan i-reconcile ang maong mga datos ngadto sa kaulohan sa National Vaccination Operations Center (NVOC) aron mahiusa ang numero o parehong mabutang sa Alert Level 1 ang ubang syudad o lungsod sa isla sa Sugbo.
