Cebu City– Dili makatuo ang mga deboto sa mahal nga Birhen sa Fatima sa ilang nasaksihan atol sa gipahigayon nga misa alang sa ika 100 ka tuig nga anibersaryo niini sa Theotokos Shrine, Brgy Perelos dakbayan sa Carcar, Cebu.
Pasado alas-sais ganihang buntag sa dihang nakalitan ang tanang deboto nga nanambong sa misa diin matud pa nga kalit lang nga nagpakita ang adlaw gikan sa madag-umon nga kalangitan. Gisaysay sa Bombo Radyo sa usa sa mga deboto nga si Blessy paghuman gayud sa seremonya sa pag konsegrar sa Tabernakulo ug samtang gibasa sa usa ka layko ang mensahe sa Mahal nga Birhen , migawas ang adlaw.
Dugang pa niini nga tuman kahayag ang sidlak sa adlaw, ug matud pa nga nag usab-usab ang kolor niini apan wala gayud makasinati ug tumang kasuwaw.Matud pa nga susamang nagdayan-dayan sa kahayag ang adlawa samtang nag-pakita sa nagkadaiyang color niini sama sa blue, pink, gold,ug orange.
Dili mu menus sa matud pa sa 2 ka minutos ang nasaksihan sa mga deboto nga gikaingong usa ka milagro. Nanghilak ug nagsyagit ang mga deboto human sa ilang nakit-an ug sa dili masabtan nga gibati.
