CEBU CITY- “Walay klarong kasabut” Mao kini ang gibutyag ni Cebu City Councilor, Jun Alcover, human gi veto ni Mayor Nestor Archival ang usa ka ordinansahon sa Konseho sa Siyudad nga naghatag sa mga kapitan sa barangay og eksklusibong awtoridad sa pag-validate sa mga drayber sa habal-habal ug tricycle nga nangayo og subsidyo sa gasolina.
Kini nakahatag og kabalaka sa mga miyembro sa konseho kinsa nagpasidaan nga ang sentralisadong accountability ug kontrol ubos sa Office of the Mayor magladlad sa iyang opisina sa grabe nga mga risgo sa administratibo ug pinansyal atol sa proseso sa pag-liquidate sa subsidyo.
Sa usa ka partial veto nga gipetsahan Mayo 13, gibasura ni Archival ang usa ka probisyon sa Section 7 sa City Ordinance No. 2816, ang ordinansa nga nagtugot sa Supplemental Budget No. 1 sa Cebu City para sa 2026, nga mokabat sa kapin sa ₱831 milyon.
Gitangtang sa veto ang usa ka spesipiko nga clause nga nag-ingon nga “ang pag-validate sa mga drayber sa habal-habal nga motorsiklo ug mga drayber sa tricycle himuon sa hingtungdang Punong Barangay diin sila nag-operate.”
Ang probisyon kabahin sa ₱35 milyon nga fuel subsidy program sa siyudad nga gituyo aron matabangan ang mga drayber sa public utility ug transport nga makasagubang sa nagkataas nga presyo sa gasolina.
Matud ni Alcover nga misaad ang kagamhanan sa pag-aprobar sa maong resolusyon alang sa pagpanghatag sa maong mga hinabang apan makadismaya nga daw gigamit niini ang pagpamolitika.
Gihimug-atan sa Konsehal, nga buhis sa katawhan ang gibabagan ni Archival og dili kini iyang kwarta.
Apan nanghinaot gihapon si Alcover nga mausab ang huna-huna sa Mayor gumikan kay usa kini ka kasabutan nga giaprobahan tali sa kagamhanan og konseho.
