Gipasiugda sa Malacañang nga ang mga hulga sa kinabuhi ni Presidente Ferdinand Marcos Jr. seryoso human nahisgotan pag-usab ang mga pahayag ni Davao City Mayor Sebastian “Baste” Duterte ug Bise Presidente Sara Duterte atol sa impeachment trial.
Sumala ni Palace Press Officer, Usec. Claire Castro, ang Presidente dili bag-o sa susamang mga hulga ug nasayod nga gikan kini sa iyang mga kaatbang sa politika, labi na gikan sa mga Duterte.
Dugang ni Castro nga obligasyon sa mga hingtungdang ahensya ang pagsiguro sa seguridad sa Presidente ug pagpahigayon og hingpit nga imbestigasyon.
Gihimug-atan usab ni Castro nga dili angay isipon nga usa ka komedya tungod kay ang kinabuhi sa Presidente ang nameligro.
Gidugang ni USec Castro nga tungod sa mga hulga sa kinabuhi sa Chief Executive, ang hugot nga seguridad dugay na nga gipatuman alang sa Presidente.
Dugang gipunting sa Opisyal sa Palasyo nga bisan unsang lebel sa proteksyon nga gikinahanglan sa Presidente kinahanglan ihatag sa mga hingtungdang ahensya ug, kung kinahanglan nga hugtan ang seguridad tungod sa madungog ug makita nga mga hulga, kini kinahanglan buhaton lamang aron masiguro ang kaluwasan sa Presidente.
