CEBU CITY – Patay ang usa sa pito ka mga sakay sa government vehicle nga gisakyan sa mga empleyado sa Department of General Services (DGS) human nga madisgrasya diha sa Brgy Bonbon, bukirang bahin sa dakbayan sa Sugbo kagahapong adlawa.
Giasoy ni Ronald Malacora, ang head sa DGS, nga ang pito sakay sa truck mipaingon sa Brgy Sudlon I arun nga maghatod sa mga tent nga gamiton alang sa anibersaryo sa usa ka simbahan sa maong barangay.
Matud pa nga sa dihang paingon na unta kini pabalik sa syudad, milagbas kini sila sa Brgy Bonbon diin gihulagway nga kurbadahon ang dalan ug giingong nawad-an og preno ang maong sakyanan hinungdan nga natagak kini sila sa bung-aw.
Giila ang namatay nga si Victor Reyes, 35 anyos ug residente sa Punta Princesa, dakbayan sa Sugbo.
Samtang ang unom nga naangol ang nailhan nga sila si Danilo Oporto, Ignacio Ocampo, Andres Esparagera, Junlifer Cantaruna, Michael Amante ug Winnie Cabual.
Giingong dali man nga naka-responde ang kapulisan apan nakabsan gayud sa kinabuhi si Reyes, samtang ang tulo sa unom ang nakagawas na sa tambalanan, ang tulo nga nahibilin ang gi-refer pa sa orthopedics kung gikinahanglan gumikan kay basin og aduna kini bali sa bukog ang tulo.
Samtang gipahibalo usab ni Malacora mu-abaga ang Cebu City government sa galastuhan sa mga biktima kinsang duty niadtong higayona.
