CEBU – Gihangop sa mga kutsero ang bag-ong sugyot nga ordinansa karon sa konseho sa dakbayan sa Sugbo nga nagtumong sa pag-regulate sa operasyon sa “tartanillas” o ang tradisyonal nga karwahe nga giguyod sa kabayo nga nag-agi sa mga karsada sa dakbayan.
Sa pakighinabi sa Bombo Radyo News Team kang Julita Fernandez nga usa ka kutsero, nimaayo na ang dagan sa ilahang pagbiyahe karong panahona itandi panahon sa pandemya diin makabawi na sila sa ilahang pagpangutsero.
Subay sa bag-ong ordinansa nga giduso sa konseho kabahin sa ilahang sitwasyon, gihangop ni Fernandez ug sa ubang mga kutsero ang gisugyot nga ordinansa gumikan mahatagan na sila og kahigayonan nga makahibaw sa dagan sa ilahang sitwasyon ilabi na karon nga nabiyaan na sila sa gobyerno.
Gani, andam silang mga kutsero nga mo-cooperate sa mga plano sa dakbayan ilabi na sa mga seminars ug workshops nga idalit sa umaabot.
