CEBU CITY — Nanghinaut ang Department of Education (DepED)-7 nga magpabilin ang pagtinabangay sa mga ginikanan ug magtutudlo aron makalahutay ang pagtuon sa mga magtutungha ning panahon sa new normal.
Kini human nga niabot sa 99 porsyento sa mga tinun-an lukop nasud ang nakapasar sa Quarter 1 ning kasamtangang school year gumikan sa “consideration.”
Matud ni DepED-7 Director Dr. Salustiano Jimenez nga mas maayong lantawon usab kung pila ba usab ang porsyento sa mga tinun-ang igo lang nga nakaabot sa passing rate.
Nakita ni Jimenez nga grabe ang pagpaningkamot sa mga magtutudlo ngadto sa mga ginikanan ug tinun-an ilabi na sa pagcommunicate kanila.
Hinungdan nga angayan usab nga pagatutukan ang edukasyon sa mga bata kinsang nagskwela gamit ang managlahing distance learning modules.
Hinuon adunay pipila usab ka mga komunidad ang nakabaton og maayo nga passing rate gumikan kay daghang mga tinun-an ang naningkamot sa ilang pagtuon bisan pa man og wala pa nagsugod ang face-to-face classes.
