CEBU CITY-Makaproseso na ang mga manaygunay sa dakbayan sa Sugbo sa permit nga gikinahanglan subay sa bag-ong gilagda sa Cebu City Anti-Mendicancy Board nga “No permit, No Carolling in Cebu City,” policy.
Aron makapadayon ang mga carolers, kinahanglang mosuwat sila og request letter ngadto kang Mayor Raymond Alvin Garcia, uban sa mga opisyal nga dokumento sama sa ilang Barangay Clearance ug Valid ID.
Ug kon gani makompleto na ang tanang mga dokumento, ang mga manaygunay kay mamahimo nang molahos sa opisina sa CCTO, Anti-Mendicancy Office, BPLO, ug Mayor’s Office.
Gipahinumduman usab sa buhatan nga walay bayad ang pagkuha og permit.
Kini nga polisiya nagsunod sa City Ordinance (CO) 1631 diin gidili ang pagpakilimos o paghatag og limos sa kadalanan sa dakbayan sa Sugbo.
Atol sa pakighinabi sa Bombo Radyo Cebu ngadto kang Grace Luardo ang head sa CESET, gibutyag niini nga kinahanglang sundon ang matag lagda aron makakuha og permit ug labaw sa tanan aron dili sila dakpon sa mga sakop sa Anti-Mendicancy Board.
Gipahimanoan usab niini ang mga drayber sa mga traditional jeep ug mga modernong jeepneys nga motabang ug mokooperar sa pagbadlong kon gani adunay mga mosakay nga manaygon.
Diin tumong niini aron dili maabusaran ug matuman gayud ang gihimo nga ordinansa.
