Giawhag sa Presidential Anti-Organized Crime Commission (PAOCC) ang mga lokal nga kagamhanan, partikular na ang mga mayor, sa pagtabang sa pagbungkag sa mga ilegal nga Philippine Offshore Gaming Operators (POGOs) nga gitawag niini og scam farms.
Matod sa tigpamaba sa PAOCC nga si Winston Casio, kinahanglang kuhaon sa Department of the Interior and Local Government (DILG) ang atensyon sa tanang local chief executives diin nagbasi ang maong scam farms.
Gisaway sa opisyal sa PAOCC ang Pagcor tungod sa giingong kakuwang sa pagmonitor sa mga POGO ug niinsister nga dili mahuman ang responsibilidad sa gaming regulator kon kanselahon na ang POGO permit.
Gitataw pa sa opisyal nga kinahanglang makig-alayon ang Pagcor sa mga hingtungdang ahensiya sa gobyerno lakip na ang BI ug DILG aron maseguro nga dili maka-operate ang mga POGO kansang permit nakanselar.
Ang opisyal nihimo sa pag-anunsyo human ang PAGCOR mitaho nga adunay mga 250 ka POGOs nga nag-operate sa nasud nga walay saktong lisensya ug posibleng nalambigit sa nagkalain-laing krimen.
