CEBU CITY — Gipaubos sa HIV testing ang narescue lakip na ang 11 ka minor de edad atol sa operasyon batok sa Human trafficking nga gipahigayon sa usa ka KTV bar sa Brgy. Camputhaw, dakbayan sa Sugbo.
Kini ang gibutyag ni Police Colonel Gemma Vinluan ang director sa Cebu City Police Office (CCPO) kung diin nasuta nga kining mga narescue ang gipangbugaw para magbaligya sa ilang unod.
Matud ni Vinluan nga sa kadugay niya nga nakigbatok sa Human trafficking subay na usab sa iyang adbokasiya para sa kabatan-onan nga dili mahisubay sa hiwi nga dalan.
Samtang padayon usab ang background check sa kapulisan sa 3 ka mga suspect nga nagbugaw sa mga narescue nga sila si Jefferson Taplada, 44 anyos, Ricardo Deligero, 30 anyos, ug usa ka minor de edad nga pulos taga-Cebu City.
Matud usab ni Vinluan nga i-turn over ang 16 anyos nga suspect sa DSWD samtang nabalhog ang duha ka mga dinakpan sa detention cell sa CCPO.
Sutaon pa usab kung ang mga suspect wala ba nalambigit sa iligal nga drogas sanglit atol sa operasyo nakuhaan man kini og 2 ka book nga tin foil. (with reports by Bombo Mich Dialogo/FDP/GN)
