CEBU CITY-Dako matud pa nga kwestyonable ang mitumaw karon nga mga nagpaila nga dunay mga ‘vision’ o mga ‘prediction’.
Kini ang pamahayag ni Dr. Rene Josef Bullecer, ang main anchor sa Bombo Radyo Cebu Holy Rosary ug International Human Life Advocate. Kini subay usab sa mga mikatap nga mga panagna karon sa social media nga nagrelate sa mga katalagman og ilabina sa nahitabo ni Kobe Bryant nga natag-an matud pa sa usa ka ginganlan og ‘Rudy Baldwin’.
Matud ni Bullecer nga kinahanglan usa nga ikonsiderar ang background niining maong indibidwal sanglit imposible matud pa nga mutugdon lang og kalit ang espiritu santo niini apan kwestyonable pa ang background niini.
Gani daghan matud pa kaayo ug kuti ang pakigsusi niini. Hinoon, gitataw ni Bullecer nga dili judgmental ang simbahan kabahin niini apan gisiguro lang sa simbahan nga dili kontra sa bibliya ang naasoy nga mga prediction sanglit wala nay laing tataw pa sa nakalatid sa bibliya kalabot sa mga umaabot nga panghitabo.
Dugang pa niini nga nakalatid na usab matud pa sa bibliya nga daghan ang mutumaw ug magpaka-aron ingnon nga mini nga mga propeta ug kini ang buhat matud pa sa dautan.
Pahimangno ni Bullecer nga dili lamang magpatoo- too niini inay mas hugtan pa ang pagkamang-inampoon ug mag-amping sa kanunay.
