Gitataw sa legal counsel sa mga biktima nga mopasaka sila og kaso batok ni “boy laway” nga taga-Danao City kinsang namahid og pintal nga naay laway sa mga bisita niadtong Sinulog grand parade sa dakbayan sa Sugbo.
Kini human nga mipatim-aw sa Cebu City Hall ang magtiayon kinsang gikatahong nabiktima sa binuhatan sa giilang si Jayson John Tapales, nga giingong subject sa maong viral video.
Matud sa legal counsel ug uyuan sa mga napahiran nga si Atty. Joel Bontuyan nga desidido silang mopasaka og kaso gumikan kay hilabihan silang nauwawan sa maong video.
Nanghinaut ang maong abugado nga mopatim-aw si Tapales o giilang “boy laway” aron ipasabot kung nganong nabuhat man ang maong paghugaw-hugaw niadtong Sinulog.
Samtang hilabihang naglagot si Cebu City Councilor Joel Garganera sa giingong paghugaw-hugaw ni Tapales sa mga mi-agi sa Mango Avenue.
Kini human nga nakigkita ang mga biktima ngadto sa konsehal aron ipadangat ang maong reklamo.
Naglaum si Garganera sa publiko nga matultulan niini ang kasayuran kalabot ni Tapales subay na sa maong imbestiugasyon.
Nasayran nga deactivated ang social media account ni Tapales human nakaangkon og daghang pagsaway sa publiko ang video kalabot na sa paghugaw-hugaw niini niadtong Sinulog.
