CEBU – Plano nga ipatawag ni Cebu City acting Mayor Michael ‘Mike’ Rama ang tanang mga nanag-iya ug bar sa dakbayan sa Sugbo kinsang nag-serve ug mga ilimnong makahubog.
Kini subay usab sa nagkadaghan nga ihap sa mga bar nga nakalapas sa COVID-19 protocols.
Gibutyag ni Rama nga ipatawag niya kini pinaagi sa usa ka virtual meeting kauban ang IATF Deputy Chief sa Visayas nga si Gen. Melquiades Feliciano ug ang Cebu City Emergency Operation Center (EOC) nga gipangulohan ni Cebu City Councilor Joel Garganera.
Matud ni Rama nga kinahanglan nga mahan-ay ug tarung ang mga polisiya subay na sa paglibkas sa liquor ban sa dakbayan nga una nang gi-anunsyo ni Cebu City Mayor Edgardo Labella.
Gitataw sa acting mayor nga suportado niini ang paglibkas sa liquor ban apan gikinahanglan kini nga muhimo ug aksyon kung ugaling maabuso na ang maong deklarasyon.
Mibahad kini nga isuspenso ang business permit sa mga bar nga makalapas sa gihapon sa mga guidelines nga ilaha unyang masabotan.
