CEBU CITY- Miulbo ang dakong sunog sa mga panimalay sa Sitio Filter Site, Barangay Tisa ning dakbayan sa Sugbo niadtong Lunes sa buntag, Marso 23, 2026.
Sumala pa sa report sa Cebu City Fire Office nga ang alarma sa sunog kay una nilang nadawat pag alas-11:35 sa buntag kun diin daling girespondehan kini sa Barangay Fire Brigade sa Tisa pag alas-11:41 nga susamang orasa giisa ang first alarm status.
Apan tungod sa kakusog mulatay sa mga kasikbit nga mga panimalay kay nakapa-aghat sa pag-isa sa second alarm status pag alas-11:53. Kapin tunga sa oras usa nadekalar nga under control ang maong sunog.
Milanat pa sa kapin upat ka oras ang pakigkumbati sa kabumberohan sa pagpawng sa sunog hangtod sa na fire out na kini.
Dili muminos sa 20 ka mga fire trucks ang miresponde sa maong dapit nga pinakadakong hagit nila mao ang kahuot sa dalan aron makaagi ilang sakop ug ekipo.
Samtang sa inisyal nga taho sa sunog, gituohang nagsugod kini tungod sa electrical issue nga nakaapektar sa 148 ka pamilyahan kun 509 ka mga indibidwal. Adunay pasiunanag ihap sa 127 ka mga balay ang naapektohan diin 112 ang totally damaged samtang ang nahabilin kay gikategoryang partially damaged.
Kasamtangang gipahimutang sa Tisa National High School ang mga biktima sa sunog samtang giandam pa ang ilang evacuation site sa Tisa 1. Ang kagamhanang dakbayan pinaagi sa Department of Social Welfare and Services (DSWS) kay nagpasalig nga mudalit og pagkaon ug hinabang sa mga biktima sa maong insidente sa sunog.
