Libre na ug dili na kinahanglang mobayad ang mga pasahero ug bisita aron makagamit sa mga pansayan o CR sa Cebu South Bus Terminal (CSBT) ug Cebu North Bus Terminal (CNBT).
Kini human nga gipirmahan ni Gov. Pamela Baricuatro ang Executive Order No. 12 niadtong Hulyo 7, nga nagmando sa terminal management sa paghunong sa pagpangolekta ug bayad sa mga pansayan.
Gitumbok sa gobernadora ang Republic Act No. 11311, nga nag-require sa land transport terminals sa paghatag ug basic sanitary facilities—sama sa mga kasilyas—nga walay bayad, isip ilang basehan sa pagpatuman sa bag-ong polisiya.
Kahinumdman nga sa wala pa ang kamandoan, ang mga pasahero kinahanglang mobayad og tali sa P5 ngadto sa P10 aron magamit ang mga kasilyas sa CSBT ug CNBT, nga niani og pagsaway sa publiko atol sa pagbisita ni Senador Raffy Tulfo niadtong buwan sa Abril.
Dugang usab niini nga gitun-an usab ni Baricuatro ang posibilidad nga pagbalik sa manual nga ticketing service.
Kung mapadayon ang plano, ang mga pasahero tugutan nga makasulod sa waiting area ug direkta nga mosakay sa ilang mga bus, nga balihon ang kasamtangang polisiya nga kinahanglan ang pagpalit og tiket sa dili pa mosulod.
Gipasalig sa usab sa gobernadora nga ang pagbalik sa manual ticketing walay dakong epekto sa kita sa probinsya, tungod kay ang kinabag-an sa kita sa terminal gikan sa bayad sa parking lot ug dili ticketing.
Sapikas bahin, si Baricuatro wala pa makatudlo ug bag-ong terminal managers alang sa CSBT ug CNBT, apan miingon nga ang pagdumala sa terminal operations nagpabiling prayoridad ubos sa iyang administrasyon. | Bombo Nathaniel Sandoval
