CEBU – Nagkaguliyang ug nanggawas ang mga personnel sa Qimonda Building human makompirmar sa kapolisan nga nakadawat sila og mga taho sa giingong hulga sa bomba niadtong Miyerkules, Marso 9, 2022.
Base sa impormasyon sa Mabolo Police Station, gikatahong nakadawat ang mga personnel sa Qimonda building sa North Reclamation Area og bomb threat kung diin sa maong lugar usab nahimutang ang Cebu City Hall of Justice.
Nadawat sa kapulisan ang maong taho pasado na alas 1:44 sa hapon.
Tungod niini, ang tanang personnel sulod sa Quimonda Building, lakip na ang mga nagtrabaho sa trial courts, ang gimanduan nga temporaryong biyaan ang propyedad isip pag-amping.
Naabot dayon sa lugar ang Cebu City’s K9 unit ug Regional Explosive Canine Unit in Central Visayas (RECU-7) aron pagsusi sa sitwasyon ug aron iberipikar ang katinuod sa bomb threat.
Gibutyag ni Daniel Salazar, usa sa mga security guard sa maong building, nga lima ka mga huwes ang nakadawat og textmessage mahitungod sa hulga hinungdan nga dali silang gimandoan sa supervisor ug head sa security guards sa pagsiguro sa area ug sa mga tawo nga anaa sa sulod sa building.
Dili usab kini makasulti kung nga klase sa bomb threat gumikan wala kini makadawat o makakita sa maong mga text message.
Sa maong panghitabo, dali ra nga nakaresponde ang otoridad aron sa pagsusi sa maong pagpanghulga.
