CEBU CITY — Naka-heightened alert gihapon ang mga sakop sa Philippine Coast Guard (PCG)-7 ngadto sa tanang mga pier sa Central Visayas nunot na sa panahon sa kalag-kalag.
Matud sa tigpamaba sa Philippine Coast Guard (PCG)-7 nga si Liutenant Junior Grade Michael John Encina, nga nagtinabangay ang mga sakop sa Coast Guard, MARINA, ug PNP-Maritime alang sa pagmentenar sa kahapsay sa mga byahe ilabi na nga daghan ang mamauli sa tagsa-tagsa ka mga probinsya.
Gipangkatap usab ang mga K9 units sa mga pier aron dili daling makalusot ang mga bomba ug explosives.
Samtang naka-standby usab ang specialized K9 dog nga si “Porky” alang sa mga pork products sa Luzon nga moabot sa Sugbo.
Gihimug-atan ni Encina nga importanteng pasuoton ang mga pasahero og life jacket sa ilang gisakyang vessel alang sa ilang kaluwasan sa pagbyahe.
Gitataw niya nga responsibilidad sa mga nanag-iya og sakyanang pandagat ang pagpasuot og life jacket sa mga pasahero ug ang Coast Guard mismo maoy mo-check niini.
Hugot nga gidid-an sa PCG-7 ang overloading sa mga sakyanang pandagat sa dili pa kini molarga.
Mipahinumdom si Encina sa mga mobyahe ning panahon sa kalag-kalag nga magtinabangay ug motuman sa mga security measures alang sa hapsay nga pagbyahe.
