Nanawagan ang Philippine Consulate General sa Los Angeles sa komunidad sa mga Pilipino sa Habagatang California nga mag-amping tungod sa delikado ug molungtad og dugay nga heat wave nga nagdala sa pagsaka sa temperatura sa rehiyon.
Sumala sa National Weather Service, usa ka Extreme Heat Warning ang gi-isyu alang sa dagkong mga bahin sa Los Angeles ug Orange County, diin ang temperatura gilauman nga moabot tali sa 102 ug 107 degrees Fahrenheit sa pipila ka mga lugar karong hinapos sa semana.
Busa, ang konsulado nagtambag sa mga Pilipino nga magpabiling hydrated, limitahan ang mga kalihokan sa gawas, ug magpabilin sa bugnaw o air-conditioned nga mga palibot aron malikayan ang mga sakit nga may kalabutan sa kainit.
Samtang, mamahimong mobisita ang mga residente nga walay air conditioning sa balay sa mga pampublikong pasilidad sama sa mga librarya ug mga senior center, o motawag sa 311 aron makit-an ang labing duol nga cooling facility.
Nipahinumdom usab ang mga awtoridad sa publiko nga dili gayud biyaan ang mga bata, mga tigulang, o mga binuhi sulod sa mga naka-parking nga mga sakyanan, tungod kay ang temperatura mahimong paspas nga mosaka sa makamatay nga lebel.
