CENTRAL VISAYAS- Gipaabot nga mosunod sa template sa Sugbo ang ubang mga lalawigan sa Kabisay-an sa pagbaligya sa bugas sa tag P20 matag kilo, nga bag-o lang gipahibalo sa Department of Agriculture (DA) niadtong Miyerkules, Abril 23 sa Cebu Provincial Capitol, subay sa inisyatiba sa kasamtangang administrasyon.
Sundon sa naasoy nga mga lalawigan ang “Sugbo Merkado Barato” (SMB) nga programa sa paghatod sa mas baratong bugas sa ilang mga konstituwente.
Una niini, ang Department of Agriculture (DA) nipahibalo nga ang budget rice program opisyal na nga sugdan sa tibuok Visayas sunod semana,kini human sa panagtagbo ni Presidente Ferdinand Marcos Jr. ug sa mga gobernador gikan sa Kasadpan, Sentral, ug Sidlakang Kabisay-an niadtong Miyerkules, Abril 23, 2025, sa Cebu Provincial Capitol.
Ang mga gobernador nga nitambong mao ang ga musunod: Aklan Governor Jose Enrique Miraflores, Guimaras Governor JC Rahman Nava, Iloilo Governor Arthur Defensor Jr. sa Western Visayas; Cebu Governor Gwendolyn Garcia sa Central Visayas; Negros Oriental Governor Manuel Sagarbarria, Siquijor Governor Jake Vincent Villa sa Negros Island Region; Biliran Governor Gerard Roger Espina, Eastern Samar Governor Ben Evardone, Leyte Governor Jericho Petilla, Southern Leyte Governor Damian Mercado, Northern Samar Governor Edwin Ongchuan, ug Samar Provincial Board Member Fe Tan Arcales nag-representa kang Governor Sharee Ann Tan sa Eastern Visayas ang tanan nagkasabot nga ipatuman ang programa sa ilang tagsa-tagsa ka probinsiya.
Gani, si Aklan Gov. Miraflores niingon nga bulahan sila nga makasunod sa gihimo sa Probinsiya sa Sugbo ug makapahaom niini sa ilang mga lugar.
Gipangunahan sa Kagamhanan sa Probinsiya sa Sugbo ang inisyatiba niadtong Oktubre 2023 pinaagi sa SMB program, nga naghatag ug bugas nga tag P20 matag kilo sa mga municipal o city outlets sa tibuok probinsya.
Ubos sa P20 nga programa sa DA, ang bugas makuha pinaagi sa Food Terminal Incorporated (FTI) sa tag P33 matag kilo ngadto sa mga probinsiya.
Ibaligya na unya sa mga probinsiya ang bugas ngadto sa ilang mga konstituwente sa tag P20, diin ang P13 abagahon sa local government unit (LGU) ug ang nasudnong kagamhanan kay mo-abaga sa P6.50.
