Nagpakita og hugot nga pagsupak ang mga residente sa Barangay Guba, Cebu City, tungod sa plano nga pagtukod sa P5-bilyones nga Waste-to-Energy (WTE) project sa ilang lugar.
Kini, bisan pa sa pag-aproba sa joint venture agreement (JVA) tali sa Cebu City government ug New Sky Energy Philippines niadtong 2022, hangtod karon, wala pa gihapon masugdan ang proyekto tungod sa kusog nga pagsupak sa mga residente.
Matud sa mga lumulupyo nga dili nila gusto nga mahimong lugar sa pasilidad ang ilang barangay tungod sa posibleng kadaut sa kalikupan ug kahimsog sa mga tawo.
Gani, sa dihang nagtabi ang barangay konsehal nga si Lito Ardiente, dili na mapugngan ang kalagot ug kasuko sa mga pumoluyo.
Pagpasabot sa konsehal, ang ilang tingog nagsulti nga mas importante ang pagprotekta sa kinaiyahan kaysa sa pagsugod sa proyekto.
Nagpakita usab sa iyang tibuok suporta si Hon. Lauron, ang kapitan sa Barangay Cambinocot sa mga residente sa Brgy. Guba, nga klarong nangayo nga hunongon ang proyekto nga ilang gibati nga makadaot sa kalikupan ug kahimsog sa komunidad.
Una na usab nga nahinabi sa Bombo Newsteam si Konsehal Joel Garganera, usa sa mga tigpasiugda, kinsa nangatarungan nga ang teknolohiya luwas ug gigamit sa ubang mga nasud sama sa Singapore ug Japan.
Matod niya nga ang pasilidad makapamenos sa gidaghanon sa basura sa siyudad sa 90-porsiyento ug makapamenos sa kabug-at sa mga landfill.
Gipunting usab ni Garganera ang mga peligro sa kinaiyahan sa naglungtad nga mga landfill, sama sa makahilo nga “leachate,” usa ka likido nga gihimo sa nangadunot nga basura, nga nakahugaw sa yuta ug mga sistema sa tubig.
Sa pagkakaron, nagpabilin ang tensiyon ug nagpadayon ang diskusyon samtang naghulat ang tanan sa sunod nga lakang sa maong proyekto.
