CEBU – Nagbayanihan ang pipila ka mga kalalakin-an sa Sitio Langoyon, Campo 6, Barangay Manipis, dakbayan sa Talisay, arun nga mapadaplin ang mga dagkong bato nga nangatagak human sa makusog nga uwan kagahapon subay sa pagkuso-kuso sa bagyong Dante.
Sa pagbisita sa Bombo News Team sa nahitabo-an sa rockslide, naaktohan ang pag-maso sa mga residente sa mga dagkong bato arun nga kini mapadaplin ug dili mag-ali sa kadalanan.
Gibutyag ni Rolito Heredia, usa ka barangay tanod, nga boluntaryo lang ang ilahang gipahigayon nga clearing operation arun nga maagi-an na ang area ug malikay sa disgrasya ang mga sakyanan ug motorista nga mangagi.
Matud ni Heredia nga mao gayud kini ang sitwasyon kung ting-uwan ug ‘automatic’ gayud nga ilahang sirad-an ang area arun nga wala’y maaksidente.
Gitataw niini nga delikado ang ilahang gibuhat ilabi na ug humok pa ang yuta, apan giingong kanunay lang usab ang ilahang pag-amping. Gani, atol sa interview, kalit nga miligid ang usa ka dakong bato gikan sa ibabaw hayan lakip ang Bombo News Team ang midagan palayo sa area.
Kahinumdoman nga lakip nga gipaubos sa Signal No. 1 ang dakbayan sa Talisay kagahapong adlawa gumikan sa bagyong Dante.llBCA
