Nag-unhanay og dagan ang mga turista human mibuto ang Mount Etna sa Italya.
Diin ang kalit nga pagbuga og baga nga aso ug abo kay daling nag-viral online sa social media.
Usa ka video nga gipaambit nga nagpakita sa gatusan ka mga turista sa ngilit sa bulkan samtang ang higanteng abo nga panganod mitabon sa kalangitan.
Samtang ang uban nagpabiling nagbarog aron masaksihan ang talagsaong talan-awon.
Mabati usab sa video ang dahunog sa pagbuto samtang ang bulkan nagbuga og liboan ka toneladang bato ug abo.
Ang Mount Etna usa ka aktibo nga bulkan sa silangang Sicily nga gibisitahan sa gibanabana nga 1.5 milyon nga mga turista matag tuig.
Bisan pa sa kadelikado kay daghan gihapon ang mibisita aron lang masaksihan ang katahom sa bulkan.
Sumala sa mga eksperto, ang nahitabo mao ang pagbuto sa Strombolian, usa ka matang sa pagbuto nga mubo apan gamhanan, ug nagpagawas og “fire fountain” o mga jet sa kalayo, abo, ug dagkong tipak sa bato.
Sa laing bahin, sumala sa lokal nga media, ang ashfall niini niabot sa Piano Vetore area ug natala usab ang gagmay nga lava flow paingon sa Valle del Bove.
Basi sa National Institute of Geophysics and Volcanology (INGV) sa Italy, ang ashfall niini gipaabot nga mokatap pa paingon sa kasadpan-amihanang kasadpan sa nasod ug ang bulkan giingong nakasinati usab karon og high seismic activity.
