Nabalaka ang mga nasod sa Middle East bahin sa posibleng pagbalos sa Iran kon ipatuman ni US President Donald Trump ang iyang gihulga nga aksyon human sa paghatag og 48-oras nga ultimatum.
Sumala ni Bombo Joseph Rivera, International correspondent sa Qatar, ang Iran nagpasidaan nga ang mga kompanya nga may kalabotan sa Estados Unidos mahimong hingpit nga maguba kon ang Washington mo-target sa ilang mga energy facility.
Dugang pa, giisip usab sa Iran ang energy infrastructures sa mga nasod nga adunay presensya sa mga base militar sa US nga usa ka lehitimong mga target.
Sa usa ka pahayag nga gipagawas sa Iran, ilang giinsistir nga dili sila ang nagsugod sa tensyon apan andam sila nga depensahan ang ilang nasod ug ang interes sa ilang katawhan kon moatake ang ilang kaaway.
Gipasabot usab ni Rivera nga ang Qatar mao ang pinuy-anan sa Al Udeid Air Base, nga giila nga pinakadako nga base militar sa US sa Middle East, ug tungod niini, kini giisip nga usa sa posibleng mga target kon mograbe ang panagbangi.
Taliwala sa nagkagrabe nga tensyon, ang lainlaing mga nasod nagpadayon sa panawagan alang sa diplomasya aron mapugngan ang mas lapad nga panagbangi nga mahimong makaapekto dili lamang sa Middle East apan lakip usab sa ekonomiya sa kalibutan, labi na ang suplay sa lana nga moagi sa Strait of Hormuz.
Base sa datos gikan sa International Energy Agency, kapin sa 20% sa suplay sa lana sa kalibutan ang moagi sa strait, nga naghimo sa sitwasyon nga kritikal alang sa tibuok kalibutan.
