Gibasura sa Korte Suprema ang mosyon nga gisang-at ni Sen. Ronald “Bato” Dela Rosa ug kanhi Presidente Rodrigo Roa Duterte bahin sa giingong ‘arrest warrant’ nga gi-isyu sa International Criminal Court (ICC).
Atol sa En Banc Session sa Korte Suprema, gibalibaran niini ang hangyo sa mga petitioner sa ‘Very Urgent Motion’ nga gisang-at niadtong Nobyembre 12.
Gihangyo sa magbabalaod ug kanhi presidente nga mandoan sa korte si Ombudsman Jesus Crispin ‘Boying’ Remulla nga ipagawas o ipakita ang kopya sa ‘arrest warrant’ gikan sa ICC.
Kahinumduman nga bag-o lang gibutyag ni Ombudsman Remulla nga ang ICC kuno nag-isyu og warrant ug naa na siyay kopya niini.
Busa, niining bahina, gimandoan sa Korte Suprema ang Department of Justice, Department of Foreign Affairs ug uban pang mga respondents nga isumiter ang ilang mga komento sulod sa napulo ka adlaw bahin sa gilain nga ‘Very Urgent Manifestation’ sa mga petitioner.
Apan bisan pa niini, wala gihapon molihok ang Korte Suprema sa miaging petisyon ni Sen. Bato ug kanhi Presidente Duterte bahin sa kooperasyon sa gobyerno sa Pilipinas ngadto sa ICC.
