Usa ka 25 anyos nga motorista ang nakalas human ang iyang motorsiklo nawad-an og kontrol ug nabangga sa usa ka garbage compactor truck sa SRP Bridge sa Barangay Ermita, Cebu City pasado ala 1:30 sa kaadlawon niadtong Biyernes, Hulyo 31.
Giila ang biktima nga residente sa Consolacion, Cebu ug lumad nga taga Inabanga, Bohol.
Sumala sa Cebu City Police Office Traffic Enforcement Unit, ang biktima padulong sa Dakbayan sa Talisay sa dihang gikataho nga nawad-an siya og kontrol sa iyang motorsiklo, nabangga sa center island, ug nalabay sa agianan sa nagkaduol nga garbage compactor nga padulong sa Plaza Independencia.
Nakaangkon ang biktima og grabeng mga samad sa ulo ug lawas hinungdan nga gidala dayon kini sa tambalanan, diin siya gideklarar nga dead on arrival.
Mibutyag ang ang drayber sa garbage compactor sa mga imbestigador nga nakita niya ang motorista nga nawad-an og kontrol sa wala pa kini nabangga sa center island ug ang nagmaneho nalabay sa atubangan sa iyang sakyanan.
Kasamtangan karon nga anaa sa kustodiya sa kapulisan ang drayber sa trak, samtang gisusi ang CCTV footage gikan sa lugar, ug giandam ang mga kaso sa reckless imprudence resulting in homicide ug damage to property.
