Wala mouyon ang Movie and Television Review and Classification Board (MTRCB) sa sugyot nga idili ang mga salida ug programa nga adunay bayolenteng tema isip usa ka lakang aron makunhuran ang mga krimen nga naglambigit sa mga menor de edad.
Ang maong sugyot gipasiugdahan ni Philippine National Police (PNP) Chief Gen. Jose Melencio Nartatez Jr. human sa sunod-sunod nga mga insidente sa kapintasan sa mga eskwelahan.
Sumala kaniya, usa kini sa mga lakang nga angay tun-an aron matubag ang nagkadaghang mga kaso sa kapintasan nga naglambigit sa kabatan-onan.
Apan, sa usa ka pahayag, giingon sa MTRCB nga bisan pa man sa ilang pag-ila sa kabalaka sa publiko bahin sa posibleng epekto sa mga bayolenteng salida ngadto sa mga batan-on, wala sila nagtuo nga ang pagdili niini mao ang angay nga solusyon.
Gipasiugda sa ahensya nga ang pagpanalipod sa mga bata batok sa makadaot nga sulud sa mga salida ug programa dili lamang responsibilidad sa gobyerno, kondili usab sa mga ginikanan, magtutudlo, media practitioners, digital content creators, ug uban pang mga stakeholder sa industriya sa pelikula ug telebisyon.
Matud pa sa MTRCB, padayon silang nakigtambayayong sa mga sektor sa industriya aron masiguro nga ang mga pelikula, programa sa telebisyon, ug uban pang audio-visual materials nagpakita sa mga mithi ug hiyas sa pagka-Pilipino, samtang gipasiugda ang responsable ug boluntaryong regulasyon sa paghimo ug pagpasalida sa mga programa.
Gipahayag usab sa MTRCB nga ang pagdili sa mga pelikula ug programa nga adunay bayolenteng tema mahimong makalapas sa katungod sa mga Pilipinong tigpasiugda sa kagawasan sa pagpahayag o freedom of expression.
