Giaprobahan sa House of Representatives sa ikaduhang pagbasa ang usa ka balaodnon nga nagtumong sa pagpalapad sa balido sa Professional Regulation Commission (PRC) identification cards gikan sa tulo (3) ka tuig ngadto sa lima (5) ka tuig.
Ang House Bill (HB) No. 8876 gipasar pinaagi sa boto sa tingog aron mapagaan ang gasto ug makalikay sa balik-balik nga proseso sa pag-renew sa milyon-milyong Pilipinong propesyonal.
Sumala kang Leyte Rep. Ferdinand Martin G. Romualdez, usa sa mga awtor sa balaodnon, ang lakang magpagaan sa palas-anon sa mga magtutudlo, nurse, engineer, architect, accountant, ug uban pang propesyonal nga giisip nga haligi sa ekonomiya. Tumong usab niini ang pagkunhod sa red tape ug pagpaayo sa serbisyo sa gobyerno.
Lakip sa mga probisyon sa balaodnon mao ang pagpalapad sa balido sa tanang Professional Identification Cards ngadto sa lima ka tuig, pagmandato sa PRC Information and Communication Technology Service sa pag-upgrade sa digital registration system sulod sa unom ka bulan, ug pagpauswag sa sistema aron makunhuran ang pila ug mga transaksyon sa PRC.
Ang HB 8876 usa ka konsolidasyon sa siyam ka panukalang balaod nga gisumite sa lain-laing kongresista ubos sa pagpangulo ni Speaker Faustino “Bojie” Dy III ug House Majority Leader Ferdinand Alexander “Sandro” Marcos, uyon sa direktiba ni Presidente Ferdinand Marcos Jr. nga i-modernize ang mga serbisyo sa gobyerno.
