CEBU CITY-Wala matud pa’y angay kabalak-an kun wala pay simtomas ang usa ka 38-anyos nga babae kinsang niabot sa dakbayan sa Sugbo gikan sa Wuhan City, China ug nag-positibo sa 2019 N-Cov.
Kini ang gibutyag ni Dr. Rene Josef Bullecer usa ka Medical Doctor ug International Human Life Advocate.
Matud ni Bullecer nga kung sa pag-abot sa 38-anyos nga Chinese sa Cebu City wala ra kini’y problema sa iyang panglawas, pasabot nga wala ra usab kini nataptan sa virus ug wala’y natakdan.
Apan kun sa pag-abot niini sa syudad ug aduna na kini’y nga mga sintomas sa coronavirus, dako gayud ang posibilidad nga nakatakod na kini sa ubang tao Dugang pa nga kung aduna na kini’y virus daan sa iyang lawas bisan paman ug wala pa kini sintomas mamahimo lang gihapon kini nga makatakod sa uban.
Apan gitino ni Bullecer nga kun ‘protective’ kini siya sa iyang kaugalingon og sama sa pagsul-ob daan og mask, gamay ra ang posibilidad nga kini nakatakod.
Samtang giklaro ni Bullecer nga dili tanan mamatay sa matakdan og coronavirus ug dili kini 100% deadly. Kung lig-on usab ang immune system sa usa ka tao, wala kini angayang problemahon gumikan kay dili gyud kini matakdan.
Wala usab matud pa’y rason nga e-ban ang mga Chinese Nationals dinhi sa nasud kun dili kini gikan sa Hubei ug sa Wuhan, China.
‘Dili Effective’
Gihimug-atan ni Dr. Bullecer nga dili epektibo ang mga panapton nga mask nga sagad gamit sa mga tao batok sa abog isip protection batok sa virus. Gani dason niini nga mismong ang surgical mask dili usab effective.
Nasayran nga hapit tanang pharmacy sa Metro Cebu ang wala na’y baligya nga mga face mask gumikan kay nagpanic buying na na ang mga tao.
Gipasabot ni Bullecer nga ang angayang magsul-ob lamang niini mao ang mga health professionals sama sa mga nurses ug doktor nga anaa sa hospital sanglit sila ang prone sa mga sakit.
Girekomendar niini nga ang labing maayo nga gamiton batok sa coronavirus mao ang ‘N95 mask’.
Samtang, mipahimangno usab ang doktor nga likayan ang pagpanic sanglit kini usab ang hinungdan sa pagpakatap ug ‘fake news’.
