CEBU CITY – Gi-angkon ni Cebu City Councilor Jerry Guardo nga magsilbing ‘wake-up call’ ang nahitabo niadtong nakalabay’ng gabie diin nasinati ang grabeng pagbaha sa pipila ka lugar sa dakbayan sa Sugbo human nibundak ang kusog nga uwan.
Matod ni Councilor Guardo nga kinahanglan gayud nga mapatuman ang mga nakahan-ay nga short term ug long term solutions sa problema, human nga lakip sa nakitang hinungdan sa pagsaka sa tubig baha mao ang kapasidad sa pipila ka mga dagkong kasapaan sa dakbayan nga dili na maka-kaya sa bul-og sa tubig.
Sigon pa sa konsehal nga napuno na usab sa yuta ug lapok ang ubang kanal ug kadaghanan ang nabara ug wala naka-agi ang tubig gumikan sa napundok nga basura.
Subay sa nahitabo niadtong nakalabay’ng gabii, daling nipatawag og emergency meeting si Cebu City Mayor Edgardo Labella sa mga hingtungdang ahensiya sa syudad alang sa paghatag ug kasulbaran sa nitumaw nga problema.
Lakip sa giduso ni Councilor Guardo kang Mayor Labella mao ang pagpatuman og ‘political will’ sa mga illegal settlers nga nakababag sa mga gihimong flood control facility sa dakbayan, aron ma-relocate na ang maong mga pamilya.
“Maka-ingon gyud ta nga dili na angay nga lu-ag lu-agan o gamiton ang ang existing sapa. For me, it is the right time we need to recover, ilabi na sa mga ni-encroached nga mga balay nga anaa daplin sa sapa,” asoy pa ni konsehal Guardo.
Tumong sa Cebu City government nga mapalapdan ang pagmontar og flood control sa kasapaan sa syudad aron dili kini mu-awas sa panahon sa ting-uwan.
140 NGA KILO SA BASURA ANG NAKUHA SA MGA SAPA
Nikabat sa 140 ka kilo nga mga basura ang nakuha sa mga sakop sa Cebu City Department of Public Service (DPS) ingon man sa Cebu City Environment and Natural Resources Office (CENRO) gikan sa mga kanal ug kasapaan nga nibara ug usa sa gitudlong hinugdan sa pagsaka sa tubig-baha sa pipila ka dapit sa dakbayan.
Matod ni DPS Head Atty. John Jigo Dacua nga sagul-sagul ang mga basura nga ilang nakuha apan kasagaran niini mga plastic diin mano-mano kining gikuha samtang gigamitan usab ug backhoe ang uban.
“That includes ang mga nakuha sa atung kauban sa CCENRO. Sagul-sagul nana apan kadaghanan kay plastic, styrofoam ug uban pa,” sigon pa ni Atty. Dacua.
Gi-angkon ni Dacua nga regular nga gilimpiyuhan sa mga hingtungdang ahensiya ang mga kasapaan, apan limitado lang usab matod pa ang manpower sa mga buhatan nga nakatutok niini.
Hinu-on malaumon kini nga masolbad na ang maong problema ilabi na nga aduna nay nakahan-ay nga long term solutions ang syudad alang niini.
Panawagan niini sa publiko nga magtinabangay pinaagi sa responsableng pag dispose sa mga basura aron dali lang nga makuha sa taga DPS.// GBS & EKP
