CEBU CITY- Gipasiugda sa usa ka electricity consumer advocate nga kinahanglan na gyud dugangan ang suplay sa kuryente ug paspasan ang pagpalambo sa transmission lines aron malikayan ang nagpadayong rotational brownout sa Sugbo ug sa tibuok bahin sa Visayas.
Sa pakighinabi sa Bombo Newsteam, miingon si Nathaniel Chua, ang convenor sa Cebu Electricity Rights Advocates, nga ang labing importante alang sa mga konsumidor mao ang pagbaton og 24 oras nga suplay sa kuryente nga masaligan ug barato, bisan unsa pa ang gamiton nga energy source.
Subay niini, nanawagan si Chua sa Energy Regulatory Commission (ERC) ug sa Department of Energy (DOE) nga repasohon ang ilang mga polisiya ug pamub-an ang komplikadong mga rekisitos nga usahay makapaluya ug makapahinay sa pagsulod sa mga bag-ong investor sa power sector.
Gipasabot ni Chua nga nagsunod lamang sa prinsipyo sa law of supply and demand ang industriya sa kuryente.
Pasabot nga kon abunda ang suplay, awtomatikong moubos ang presyo niini sa merkado. Apan kon kakuwangon ang suplay, mapugos ang mga distribution utility sa pagpalit og kuryente bisan pa man kon mahal ang presyo niini tungod kay wala silay laing kapilian.
Aron daling masulbad ang krisis, gihangyo sa maong advocate ang mga kasamtangang power producer sa Sugbo nga modugang og mga makinarya ug pasilidad aron mapadako ang ilang generation capacity.
Kana gumikan kay mas paspas matod pa kini nga solusyon kompara sa paghulat sa mga bag-ong investor nga mokonsumo pa og pila ka tuig una makatukod og planta.
Bahin sa gitawag nga energy mix, uyon si Chua sa kombinasyon sa renewable energy sama sa solar, waste-to-energy, ug tradisyunal nga gigikanan sama sa coal.
Hinuon, iyang giila nga aduna gihapoy limitasyon ang solar power kon walay adlaw ug kon kakuwangon sa battery storage system, bisan pa man kon dako kini og tabang sa suplay panahon sa ting-init.
