Dul-an sa 500 ka mga tawo ang nangamatay atol sa Hajj pilgrimage tungod sa grabeng kainit.
Naglakip kini sa 165 ka Indonesian, 14 ka Malaysian, 68 ka Jordanian, 35 ka Pakistani, 35 ka Tunisian, 11 ka Iranian ug 98 ka Indian.
Adunay 22 ka mga taga-Jordan ang naa sa tambalanan samtang 16 ang missing.
Ang nasangpit nga gidaghanon gipaabot nga modaghan pa tungod kay ang uban anaa sa seryosong kahimtang sa tambalanan.
Ang maong pilgrimage karong adlawa giubanan sa grabeng kainit nga niabot sa 49 degrees Celsius.
Ang Saudi Ministry of Health nipasabot nga nipatuman sila og safety measures sama sa pagbutang og cooling stations sa mga rota nga tambungan sa pilgrimage.
Samtang sa pikas bahin, gikompirmar sa Department of Foreign Affairs (DFA) nga usa ka Pinay ang lakip sa namatay tungod sa grabeng kainit human nitambong sa Hajj pilgrimage sa Saudi Arabia.
Matud pa ni DFA Undersecretary Eduardo de Vega nga usa ka 37-anyos nga babaye nga nakabase sa Riyadh ang namatay niadtong Hunyo 16.
Diha-diha dayon siya gilubong human sa pipila ka mga adlaw diin siya usa sa dul-an sa 500 nga namatay sa pagtambong sa Hajj Pilgrims.
Nagpadala usab ang DFA og mga tawo sa Philippine Embassy sa Saudi Arabia aron motabang sa mga Filipino karon sa Hajj pilgrimage.
